Өңірімізде мемлекеттік тілді жетік меңгерген өзге ұлт өкілдері жетерлік. Солардың бірі – Екатерина Николаевна Бейсембаева. Абай облысы Бесқарағай ауданында дүниеге келгенімен, Екатерина қазір Шемонаиха ауданында тұрып жатыр. Қазақтың дәстүрі мен мәдениетін дәріптеп жүрген өнерлі жастардың бірі.
- Марқұм әкем мені қазақ мектебіне оқуға берді. Жасыратыны жоқ, басында қиын болды. «Бармаймын, қиын» деп жылайтын едім. Бірақ әкем әрқашан: «Оқыңдар, ертең өздеріңе керек болады, қазақ тілін білсеңдер ешкімнен кем болмайсындар» деп бізді әркез жұбататын. Менің апайым мен сіңілім бар, олар да мен секілді Березовка орта мектебін бітірді. Мен әкеме әлі күнге дейін алғысымды білдіремін. Мемлекеттік тілді білген адам шынымен де ешқашан кем болмайды. Менің ұлтым орыс болғанымен, жүрегім қазақ. Қазіргі танда мен көп этнос өкілдері тату-тәтті өмір сүріп жатқан киелі Шемонаиха жерінде тұрамын, - дейді Екатерина Бейсембаева.
- Екатерина, мемлекеттік тілге деген көзқарасыныз қандай?
- Жаңа ғана айттым ғой, мемлекеттік тілді білген адам кем болмайды. Сондықтан менің мемлекеттік тілге деген құрметім ерекше. Сол сияқты елін, жерін сүйген әрбір еліміздің азаматының қазақ тіліне деген құрметі ерекше болуы керек. Себебі қазақ тілі- Қазақстан Республикамыздың мемлекеттік тілі.
Қазақ тілін дәріптей отырып мен көптеген облыстық, республикалық байқауларға қатыстым. Ұлы тұлға Абай атамыздың өлеңдерін, қара сөздерін оқып, өнеге, тәлім-тәрбие алып, өзімді алға қарай жетелеудемін.
-Қай салада жұмыс істейсіз, сол жайлы айтып өтсеңіз?
-Мен 2017 жылдан бері Шемонаиха аудандық мәдениет үйінде әртіспін. Киелі сахнада қазақ өнерін халыққа паш етемін. Менің репертуарымда өте көп қазақ әндері бар. Десе де Гүлмира Сарина орындайтын «Шығысым шырайлы елім» әні жаныма ерекше жақын. Шынында да әлемде Шығысымыздай жер жоқ. Шығысымыз көркейе берсін! Тіліміз тұғырлы боп, көк байрағымыз мәңгі желбірей берсін деп тілеймін!
Мақала Шығыс Қазақстан лингвистикалық орталығының тапсырысымен әзірленді